Xavier Queipo
A primeira vez que un embarca todo e misterio e mitoloxías aprendidas na escasa
literatura que sobre a pesca do bacallau hai en Galicia. Pois ben, xa ao saír de
Vigo, na costa do poñente das Illas Cies, a natureza estoura con ledicia de aves
mariñas e acantilados agrestes. Logo de tres días de navegación, no medio do
Atlántico inmenso, cruzamos unha vea de auga, que leva argazos e carabelas
portuguesas chegadas do Caribe. Mais cando o barco se vai achegando as
afastadas augas de Terranova aparecen en sutil progresión : ondas de lonxitude
inmensa, coma se o mar expandise a súa superficie ou crease unha nova
dimensión; icebergs impoñentes, onde as veces se poden albisar ursos brancos
collidos por solpresa cando o xeo partira sen aviso; centos de chafarices de
baleas e cachalotes que van seguindo os cardumes de lanzóns e capeláns,
milleiros de focas, tamén, aboiando en grupos compactos entre as placas de xeo
que dificultan a navegación, e temporais desatados que fan tremer as cadernas e a
ponte de mando, as arboladuras e os mamparos, os portóns e os tranganís. Logo
está esa brétema que chega e apousenta por días enteiros, sen que o sol sexa quen
de abrir unha fenda, a mesma brétema que fai tolear peixes e mariñeiros, que
carga de eletricidade o ambiente, que fai acordar o medo e a depresión. Están
tamén os solpores imposíbeis e os alborexares fantásticos, onde na calma estanca
dos ventos podense ver nadando as orcas na distancia. E esas cores mudábeis do
auga que é gris cando azouta o vento, cinzenta escura cando o temporal pechado,
verde turquesa cando frezan os bacallaus e as luras ascenden de Georges Bank,
castaño averdado cando a néboa leva día sobre nós, azul metálico cando comenza
a picarse o mar, azul mariño cando o sol reflicte entre as nubes de mascatos e
charráns que se achegan para comer as magas polo tranganil que deita en
enxurrada de vísceras sangue os restoballos do parque de pesca. Natureza en
estado puro, tamén, nese aire salgado que enche os nosos liviáns de vida e
aventuras, nesa fala mariñeira, neses homes rudos de peitos como lareiras e
brazos de ferro, de bágoa fácil e cicatrices no corazón.
|